Mae llawer i'w wneud cyn cwblhau'r cynllun – mae’r maes cynllunio'n gymhleth, ac mae disgwyl i'r holl broses gymryd tair blynedd.

Ar hyn o bryd rydym yng ngham dau y broses - yn gofyn i drigolion am eu barn ar amrywiaeth o opsiynau ar dwf tai a swyddi ar gyfer y ddinas, hyd at 2036. Gallwch gael rhagor o wybodaeth am hynny, a chael dweud eich dweud, yma: https://cdllcaerdydd.ymgynghoriad.ai/

Mae’n bwysig iawn cynnwys pawb yn y gwaith allweddol hwn. Felly, cymerwch ran - mae eich barn o bwys.

Cam cyntaf y broses oedd ymgynghori ar ein gweledigaeth ddrafft ar gyfer y CDLl newydd.  Dros yr haf cymerodd dros 1200 o drigolion ran yn ein harolwg ar-lein, gan rannu eu barn.

Efallai nad yw hynny'n swnio'n llawer, ond ar gyfer ymgynghoriad ar strategaeth gynllunio, mae'n ffigur eithaf da.

Ond beth ddywedoch chi wrthym? A beth mae hynny wedi ei newid?

Wel, gallwch ddarllen canlyniadau llawn yr ymgynghoriad yma: https://cardiff.moderngov.co.uk/documents/s51432/Appendix%203%20Summary%20of%20consultation%20and%20engagement%20findings%20-Part%201%20Findings%20from%20Questionnaire%20Surv.pdf?LLL=0

Ond i’r rhai nad oes amser gennych (nac amynedd) i lafurio drwy bob un o'r 141 tudalen, dyma rai ystadegau rydyn ni’n meddwl fydd o ddiddordeb.

·       Ar y cyfan, roedd cefnogaeth ar gyfer llai o dwf tai (46%), ond roedd pobl o dan 35 oed, a phobl sy'n nodi eu bod yn anabl, eisiau gweld mwy o dai’n cael eu codi, gyda llawer yn sôn am brinder tai fforddiadwy.

·       Teimlai 36.5% mai dim ond safleoedd tir llwyd a ddylid eu defnyddio ar gyfer tir tai newydd, o'u cymharu â’r 2.3% a oedd yn ffafrio safleoedd maes glas ar gyfer cartrefi newydd, a’r 10.8% a ddewisodd y man canol rhwng y ddau.

·       Nododd un rhan o bump o'r ymatebwyr (19.4%) y dylai'r cynllun geisio blaenoriaethu mathau cynaliadwy o drafnidiaeth, o'u cymharu â 4.3% a oedd yn blaenoriaethu defnyddio ceir preifat, a 12.2% yn ffafrio cydbwysedd rhwng y ddau.

·       Ystyrid mai 'Mynd i'r afael â’r newid yn yr hinsawdd' oedd amcan pwysicaf y cynllun drafft, gyda 45.4% yn ei roi yn eu tri amcan uchaf, a 27.4% yn ei nodi fel yr amcan pwysicaf oll.

·       Dilynwyd hyn gan 'amgylcheddau iachach', gyda 38.8% yn ei roi yn eu tri amcan uchaf, a 6.0% yn ei roi’n gyntaf. Rhoddodd 36.3% ‘Diogelu seilwaith glas a gwyrdd (pethau fel mannau gwyrdd, coed, afonydd) yn eu tri amcan uchaf, a rhoddodd 10.2% hwn yn gyntaf.

Felly dyna a ddywedoch wrthym. Gwnaiff hyn wahaniaeth wrth i ni fynd drwy’r broses, ac mewn gwirionedd, mae eisoes wedi, oherwydd rydym wedi adolygu’r weledigaeth ac amcanion ein CDLl yn sgil eich ymatebion, gan addasu rhai o’r amcanion ac ychwanegu rhagor o fanylion.

Rhai enghreifftiau o'r newidiadau hyn yw:

·       Yn hytrach na dim ond codi "mwy o gartrefi i fynd i'r afael ag anghenion tai yn y dyfodol" bydd y CDLl bellach yn ceisio adeiladu "mwy o gartrefi carbon-isel" i fynd i'r afael â'r angen hwnnw.

·       A bydd y cynllun newydd yn sicrhau yr “hyrwyddir datblygiadau yn y lleoliadau mwyaf cynaliadwy ac y defnyddir tir yn effeithlon gan flaenoriaethu 'tir llwyd yn gyntaf'.”

·       Ychwanegwyd llinellau ar gynyddu’r "canopi coed ar draws y ddinas" a chefnogi "bioamrywiaeth ehangach" hefyd.

Gallem fynd ymlaen, ond mae'n siwr o fod yn haws os ydych yn darllen y weledigaeth a'r amcanion diwygiedig llawn. Gallwch eu canfod yma: https://cardiff.moderngov.co.uk/documents/s51429/Appendix%201%20Replacement%20Local%20Development%20Plan%20Vision%20and%20Objectives%20V0.23.pdf?LLL=0

Felly diolch i bawb a rannodd eu meddyliau ac a gafodd ddweud eu dweud.

Mae llawer i'w wneud ac mae'n deg dweud, pan ddaw'n fater o gynllunio, bod y manylion yn hollbwysig, ond gobeithio y gallwch weld eisoes o'r newidiadau hyn bod eich barn chi, ochr yn ochr â barn pobl eraill, yn gwneud gwahaniaeth go iawn.

Y cam nesaf yw i ni ddatblygu 'Strategaeth a Ffefrir' – fersiwn ddrafft o'r CDLl mwy neu lai, gyda llawer o fanylion am safleoedd, polisïau a chynlluniau strategol.  Dylai honno fod yn barod yn yr hydref 2022 a byddwn yn gofyn am eich barn arni bryd hynny. 

Os oes gennych ddiddordeb mewn dod o hyd i fwy am sut mae'r system gynllunio'n gweithio, fe gyhoeddon ddalen Holi ac Ateb y llynedd a allai fod yn ddefnyddiol. Mae honno i’w chanfod yma: https://www.newyddioncaerdydd.co.uk/releases/w66/26664.html