3.7.25

Mae Cyngor Caerdydd wedi cyhoeddi diweddariad cynhwysfawr ar ddyfodol y Pentref Chwaraeon Rhyngwladol (PChRh).

Mae'r adroddiad yn amlinellu camau nesaf strategaeth adfywio gynaliadwy a fydd yn trawsnewid y PChRh yn gyrchfan fywiog, carbon isel ar gyfer chwaraeon, hamdden a byw, gan ddarparu cartrefi ecogyfeillgar newydd, seilwaith ynni gwyrdd, ac amwynderau cyhoeddus gwell.

Mae'r adroddiad, a fydd yn cael ei gyflwyno i'r Cabinet yn ddiweddarach y mis hwn, yn nodi rhagor o fanylion am y cynllun aml-gam ar gyfer yr ardal.

"Mae datblygu'r Pentref Chwaraeon Rhyngwladol yn cynnig cyfle unwaith-mewn-cenhedlaeth i greu cymuned o'r radd flaenaf ar lan y dŵr sy'n cyflawni ein huchelgeisiau ar gyfer Caerdydd gryfach, tecach, gwyrddach," meddai'r Cynghorydd Russell Goodway, Aelod Cabinet dros Fuddsoddi a Datblygu.

"Bydd datblygu cyfleuster adfer gwres newydd, heb unrhyw gostau cyfalaf i'r Cyngor, ochr yn ochr â darparu capasiti ychwanegol i'r grid cenedlaethol yn yr ardal, yn diogelu cyfleusterau chwaraeon a hamdden yr ardal rhag costau ynni cynyddol, yn ogystal â gwneud cyfraniad sylweddol tuag at ein hymrwymiadau Caerdydd Un Blaned i leihau allyriadau carbon. Yn y cyfamser, bydd y cartrefi sydd mawr eu hangen sy'n cael eu darparu gan Orion i gyd yn cael eu hadeiladu i safonau Passivhaus ac yn sero-net wrth weithredu."

Tai Cynaliadwy

Ar hyn o bryd mae Orion yn trafod partneriaeth gyda datblygwr preswyl gwyrdd, gyda ffocws ar gartrefi carbon isel o ansawdd uchel a datrysiadau ynni arloesol.

Yn ystod cam cyntaf y datblygiad bydd cartrefi isel â fframiau pren yn cael eu hadeiladu ar hen dir Cardiff Pointe. Wedi'u hinswleiddio â deunyddiau naturiol ac wedi'u hadeiladu i safonau Passivhaus, bydd y cartrefi yn sero-net wrth weithredu ac wedi'u cynllunio er fforddiadwyedd a chysur hirdymor.

Canolfan Ynni Gwyrdd

Bydd y Cyngor yn dechrau proses gaffael i ddarparu canolfan ynni newydd heb unrhyw gost gyfalaf i'r Cyngor.

Bydd y ganolfan ynni yn adfer gwres a gynhyrchir wrth greu iâ ar gyfer yr Arena Iâ ac yn ei ddefnyddio i greu gwres carbon isel ar gyfer prif gyfleusterau hamdden y PChRh, gan gynnwys yr Arena Iâ ei hun, Pwll Rhyngwladol Caerdydd, y Ganolfan Dŵr Gwyn a'r datblygiadau preswyl cyfagos yn yr ardal.

Er mwyn sicrhau'r buddsoddiad hwn o £15 miliwn o'r sector preifat, bydd angen i'r Cyngor ddarparu tir i adeiladu'r cyfleuster arno, drwy brydles. Bydd angen ymrwymo i'r Pwll Rhyngwladol, yr Arena Iâ a Dŵr Gwyn Rhyngwladol Caerdydd gymryd lefel gytunedig o wres hefyd.

Seilwaith Trydan

Mae cyfle wedi codi i ddarparu isbwerdy newydd ar safle PChRh er mwyn cynyddu capasiti'r Grid Cenedlaethol i gefnogi'r datblygiad newydd. Er mwyn gwneud hynny, bydd angen i'r Cyngor gytuno i brydlesu ardal o dir.

Parcio ceir

Mae'r PChRh yn elwa o gysylltiadau trafnidiaeth gyhoeddus a theithio llesol cyfagos, fodd bynnag, mae angen mannau parcio ceir ar rai ymwelwyr. Mae maes parcio'r safle bellach wedi'i leoli ar safle hen faes parcio Toys R Us. Mae'r safle hwn yn darparu cyfanswm o 600 o leoedd, gyda 700 o leoedd ychwanegol bellach ar gael ar ddiwrnodau digwyddiadau.

Er mwyn cydbwyso hygyrchedd â'r angen i reoli tagfeydd a chefnogi gwaith cynnal a chadw hirdymor y cyfleusterau, mae'r adroddiad yn nodi strategaeth gwefru deg a hyblyg newydd ar gyfer maes parcio'r PChRh.

Bydd modd i ddefnyddwyr hamdden barcio am ddim am hyd at 120 munud.

Yn amodol ar gymeradwyaeth y Cabinet, bydd y ffioedd parcio fel a ganlyn:

0-2 awr -am ddim i ddefnyddwyr hamdden / £2 i ddefnyddwyr nad ydynt yn rhai hamdden

3 awr -£2 i ddefnyddwyr hamdden / £3.50 i ddefnyddwyr nad ydynt yn rhai hamdden

4 awr -£3.50 i ddefnyddwyr hamdden / £4.50 i ddefnyddwyr nad ydynt yn rhai hamdden

5 awr -£4.50 i ddefnyddwyr hamdden / £6 i ddefnyddwyr nad ydynt yn rhai hamdden

+£1 am bob awr ychwanegol

Bydd Cabinet Cyngor Caerdydd yn cwrdd ddydd Iau 10 Gorffennaf i ystyried yr argymhellion yn yr adroddiad, a bydd gweddarllediad o'r cyfarfod hwnnw ar gael i'w wylio ar y diwrnod, yma: https://cardiff.moderngov.co.uk/ieListDocuments.aspx?CId=151&MId=8863&LLL=1

Cyn cyfarfod y Cabinet, bydd Pwyllgor Craffu'r Economi a Diwylliant yn craffu ar yr adroddiad pan fydd yn cwrdd Ddydd Mawrth 8 Gorffennaf. Bydd recordiad o'r cyfarfod hwnnw ar gael i'w gwylio yma: https://cardiff.moderngov.co.uk/ieListDocuments.aspx?CId=142&MId=8742&LLL=1