14.7.25

Mae pedwar ar ddeg o glybiau chwaraeon cymunedol gan gynnwys timau pêl-droed, pêl-fasged, athletau anabl, beicio a rygbi, wedi elwa o grantiau Cyngor Caerdydd i wella eu cyfleusterau.

Mae cyfanswm o £200,000 wedi'i ddyfarnu drwy'r cynllun, a ddarparwyd mewn partneriaeth â Chwaraeon Met Caerdydd. Mae'r prosiectau a ariannwyd yn cynnwys gwelliannau i gyfleusterau cae a newid, trac beicio mynydd pob tywydd newydd, bws mini newydd, a gosod llifoleuadau i alluogi hyfforddiant yn y gaeaf.

Chwaraewr pêl-fasged ifanc yn Tribal Basketball, un o'r clybiau i elwa o grant. Llun gan: Pêl-fasged Tribal

Roedd y cynllun yn rhoi blaenoriaeth i geisiadau am grant fyddai:

• yn cynyddu cyfranogiad mewn ardaloedd difreintiedig.
• hyrwyddo amgylcheddau diogel a chynhwysol.
• gwella hygyrchedd i gyfleusterau.
• cynyddu cyfranogiad mewn chwaraeon a hyrwyddo ffyrdd o fyw egnïol; ac
• o fudd i'r gymuned leol yn gyffredinol.

Dywedodd yr Aelod Cabinet dros Ddiwylliant, Parciau a Digwyddiadau: "Mae clybiau chwaraeon lleol yn chwarae rhan bwysig yn gwella iechyd meddwl a chorfforol preswylwyr, ond y tu hwnt i hynny maen nhw hefyd yn allweddol i greu'r cymunedau diogel, hyderus a grymus rydyn ni eisiau eu gweld ledled y ddinas.

"Bydd ein cefnogaeth ariannol yn helpu i greu Caerdydd gryfach a thecach trwy alluogi clybiau o bob cwr o'r ddinas i wella eu cyfleusterau, cael hyd yn oed mwy o bobl i gymryd rhan mewn chwaraeon a pharhau i ddatblygu'r gwaith gwych maen nhw'n ei wneud yn barod."

Plant mewn sesiwn Clwb Beicio yr Eglwys Newydd. Llun gan: Clwb Beicio yr Eglwys Newydd

Un grŵp i dderbyn cyllid oedd Clwb Beicio yr Eglwys Newydd. Ar hyn o bryd mae gan y Clwb 111 o aelodau grŵp ieuenctid rhwng 6 a 17 oed. Gan weithio ar y cyd ag Ysgol Gynradd Coryton, nod y clwb yw adeiladu llwybr pwmp a chylch sgiliau beicio mynydd pob tywydd sy'n teimlo'n naturiol. Bydd eu cyllid grant yn eu galluogi i gyrraedd eu targed codi arian, adeiladu'r trac a symud ymlaen gyda chynlluniau i gynnig sesiynau ysgol a chymunedol ochr yn ochr â sesiynau clwb.

Yn y cyfamser, bydd clwb athletau anabledd, Frame Running Dragons, yn defnyddio eu cyllid i wella gofod storio ar gyfer fframiau rhedeg anabledd y clwb, gan ganiatáu iddyn nhw gael gafael ar fframiau addas yn hawdd er mwyn gallu mynd allan ar y trac a rhedeg yn llawer haws ac ehangu eu gwaith allgymorth.

Derbyniodd Pêl-fasged Tribal gyllid grant hefyd. Mae eu gemau oddi cartref yn aml yn cael eu chwarae sawl awr i ffwrdd o Gaerdydd. Bydd y bws mini newydd y maen nhw'n bwriadu ei brynu gyda'u cyllid grant yn eu galluogi i leihau'r costau sy'n gysylltiedig â theithio i'r gemau hyn, sy'n golygu y gall athletwyr ifanc o deuluoedd incwm isel fwynhau'r cyfleoedd chwaraeon o ansawdd uchel sydd ar gael yn y Gynghrair Genedlaethol.

Mae clybiau eraill sydd wedi derbyn grant yn cynnwys:

• Clwb Rygbi St Albans
• Clwb Pêl-droed Caerau a Threlái 
• Clwb Rygbi Treganna
• Clwb Rygbi St. Peters
• Clwb Pêl-droed Earlswoood Rangers
• Clwb Rygbi Crwydriaid Morgannwg
• Wildcats De Cymru
• Clwb Rygbi Llanrhymni
• Clwb Pêl-droed Splott Albion
• Clwb Pêl-droed Tredelerch
• Clwb Rygbi Pentyrch