15.7.25

Mae Caerdydd yn adnabyddus am ei pharciau a'i mannau gwyrdd hardd ac eleni mae Caeau Llandaf wedi dod yn 21^ainsafle sy'n cael ei reoli gan Gyngor Caerdydd i gyflawni'r safonau uchel sy'n ofynnol i chwifio Baner Werdd.

Bellach yn ei thrydedd ddegawd, mae Gwobr y Faner Werdd yn cydnabod parciau a mannau gwyrdd sy'n cael eu rheoli'n dda mewn 20 o wledydd ledled y byd. Gwneir gwobrau ar sail ymdrechion amgylcheddol, cyfleusterau ymwelwyr, a chyfranogiad cymunedol.

Caeau Llandaf

Dywedodd y Cynghorydd Jennifer Burke, yr Aelod Cabinet dros Ddiwylliant, Parciau a Digwyddiadau: "Mae cael 21 o faneri gwyrdd yn hedfan uwchben ein parciau yn gyflawniad gwych. Gydag ychwanegiad Caeau Llandaf eleni, mae gan Gaerdydd fwy o barciau a mannau gwyrdd o safon y Faner Werdd nag unrhyw ddinas graidd debyg yn Lloegr ac unrhyw awdurdod lleol arall yng Nghymru."

"Diolch i bawb sy'n gweithio i Gaerdydd i gynnal y mannau hardd hyn - ein staff, y Grwpiau Cyfeillion, gwirfoddolwyr a sefydliadau cymunedol lleol sy'n eu cefnogi'n hael - ni fyddai'r gwobrau hyn yn digwydd heb eich gwaith diflino."

Mae Caeau Llandaf rhestredig Gradd 2, ar lan orllewinol Afon Taf, yn un o feysydd hamdden cyhoeddus hynaf y ddinas, ar ôl cael ei brynu gan Gorfforaeth Caerdydd ym 1898.

Roedd y pryniant yn dilyn ymgyrch i "Achub Caeau Llandaf". Ofnwyd ar y pryd y gallai gael ei golli o ganlyniad i ddatblygiad tai. Wedi'i warchod gan y Cyngor rhag datblygu byth ers hynny, mae Caeau Llandaf bellach yn gartref i gaeau chwaraeon, cyrtiau tenis ac ardal chwarae i blant.

Yn ogystal â Chaeau Llandaf, cadwodd ugain man gwyrdd arall a reolir gan y Cyngor yng Nghaerdydd - gan gynnwys tair mynwent, dwy warchodfa natur ac ynys - eu Baneri Gwyrdd presennol hefyd.

Dywedodd yr Aelod Cabinet sy'n gyfrifol am Wasanaethau Profedigaeth, y Cynghorydd Norma Mackie:  "Mae gwobrau'r Faner Werdd ar gyfer Mynwentydd y Gorllewin, Cathays a Draenen Pen-y-graig yn deilwng. Mae'r rhain yn fannau pwysig iawn i drigolion Caerdydd ac rwy'n falch bod y gofal a'r sylw a roddodd ein tîm Gwasanaethau Profedigaeth i'w cynnal wedi cael ei gydnabod unwaith eto."

Dyma'r rhestr lawn o safleoedd a reolir gan Gyngor Caerdydd i ennill statws y Faner Werdd eleni:

• Parc Bute 
• Morglawdd Bae Caerdydd
• Gwarchodfa Gwlyptir Bae Caerdydd
• Mynwent Cathays
• Parc Cathays
• Ynys Echni
• Fferm y Fforest
• Gerddi'r Grange
• Parc Hailey
• Parc y Mynydd Bychan
• Llyn yr Hendre
• Caeau Llandaf 
• Parc y Brag
• Parc Cefn Onn
• Parc Tredelerch
• Parc y Rhath
• Gerddi Bryn Rhymni
• Mynwent Draenen Pen-y-graig
• Parc Fictoria
• Gerddi Waterloo 
• Mynwent y Gorllewin

Yng Nghymru, mae cynllun y Faner Werdd yn cael ei redeg gan Cadwch Gymru'n Daclus.Dywedodd Lucy Prisk, Cydlynydd Baner Werdd Cadwch Gymru'n Daclus: "Rydym wrth ein bodd bod 21 o fannau gwyrdd a reolir gan Gyngor Caerdydd wedi cyflawni statws nodedig y Faner Werdd unwaith eto, sy'n dyst i ymroddiad a gwaith caled y staff a gwirfoddolwyr sy'n gofalu amdanyn nhw.

"Mae mannau gwyrdd o ansawdd uchel yn hanfodol i les corfforol a meddyliol cymunedau ledled Cymru, ac mae'n gyflawniad rhyfeddol bod y safleoedd hyn yn cael eu cydnabod ymhlith y gorau yn y byd. Llongyfarchiadau i bawb sydd ynghlwm!"

Ychwanegodd y Cynghorydd Burke: "Hoffwn hefyd longyfarch yr holl grwpiau cymunedol yng Nghaerdydd y mae eu hymrwymiad i'w mannau gwyrdd lleol wedi gweld 22 o Wobrau Cymunedol y Faner Werdd yn cael eu cyflwyno ledled y ddinas."

Gwobrau eraill y Faner Werdd yng Nghaerdydd

Enillodd Amgueddfa Werin Cymru Sain Ffagan, sy'n cael ei rheoli gan Amgueddfa Cymru a safle Cronfa Ddŵr Llys-faen a Llanisien Dŵr Cymru Wobr lawn y Faner Werdd.

Gwnaed Gwobrau Cymunedol y Faner Werdd i:

Ardd Canolfan Beulah, Gardd Gymunedol Chapter, Coed y Felin, Gardd Goffa Dusty Forge, Rhandir Cymunedol Fferm y Fforest, Prosiect Gerddu Byd-eang, Tyfu'n Dda Glan-yr-afon, Gwarchodfa Natur Leol Howardian, Gardd Llawfeddygaeth Lansdowne, Gerddi Llwynfedw, Caeau Chwarae a Pharc Cymunedol Pentref Llaneirwg, Gardd Gymunedol Maes y Coed, Coetiroedd Cymunedol Nant Fawr, Rhandiroedd Pafiliwn Pengam, Gardd Gymunedol Plasnewydd, Gardd Rheilffordd,  Gardd Gymunedol Glanyrafon, Rhandir Cymunedol StarGarlot, Gardd Gymunedol Llaneirwg, Gardd Pantri Llaneirwg, Gardd Gymunedol San Pedr, a Gardd Gymunedol yr Eglwys Newydd.