Roedd yr achos yn dilyn cwynion cwsmeriaid, gan ysgogi swyddogion o'r Gwasanaethau Rheoliadol a Rennir (GRhR) i gynnal archwiliadau mewn dwy archfarchnad Asda yng Nghaerdydd ar chwe achlysur gwahanol rhwng Ionawr a Mehefin 2024

Yn ystod yr ymweliadau hyn, darganfuwyd bod mwy na 100 o eitemau bwyd wedi mynd heibio i'w dyddiad defnyddio a chawsant eu tynnu oddi ar y silffoedd. Roedd y siopau yr effeithiwyd ym Mharc Manwerthu Capital, ar Heol Lecwydd, ac Archfarchnad Pentwyn, yn Heol Dering, Pontprennau.

Canfuwyd bod rhai o'r cynhyrchion bwyd hyd at saith diwrnod ar ôl eu dyddiad defnyddio, gyda llawer yn cael eu gwerthu fel eitemau parod i'w bwyta. Roedd nifer o'r cynhyrchion hyn yn amlwg yn cael eu marchnata tuag at blant, gan godi pryderon am ddiogelwch bwyd a diogelu defnyddwyr.

Mewn gwrandawiad blaenorol ar 21 Mai 2025, plediodd Asda Stores Ltd yn euog i bedwar cyhuddiad o werthu bwyd anniogel. Roedd y troseddau’n cynnwys gwerthu eitemau risg uchel fel cig a chynhyrchion llaeth, sy'n peri risg sylweddol i iechyd os cânt eu bwyta y tu hwnt i'w dyddiadau defnyddio.

Mae dyddiadau defnyddio yn gyfreithiol ofynnol ar gynhyrchion bwyd tra darfodol gan y gwneuthurwyr i sicrhau bod cwsmeriaid yn prynu ac yn bwyta bwyd sy'n ddiogel. Mae gwerthu bwyd sydd wedi mynd heibio'r dyddiad hwn yn torri rheoliadau diogelwch bwyd a gall arwain at ganlyniadau iechyd difrifol.

Croesawodd y Cynghorydd Norma Mackie, Aelod Cabinet sy'n gyfrifol am Wasanaethau Rheoliadol a Rennir yng Nghyngor Caerdydd, y ddirwy a osodwyd gan y llys, gan ddweud: "Dylai defnyddwyr fod yn hyderus bod y bwyd sydd ar werth mewn siopau yn ddiogel i'w fwyta. Mae'n hanfodol bod systemau cadarn ar waith i atal gwerthu bwyd y tu hwnt i'w ddyddiad defnyddio. Yn yr achos hwn, roedd Asda yn sylweddol is na'r safonau gofynnol a ddisgwyliwyd. Roedd y systemau oedd ganddynt ar waith yn amlwg yn annigonol ac rydym yn gobeithio bod Asda bellach wedi cymryd y camau angenrheidiol i unioni'r methiannau hyn i sicrhau nad yw digwyddiadau o'r fath yn digwydd eto."

Cyfeiriodd y Barnwr Rhanbarth Charlotte Murphy at ddifrifoldeb y troseddau, hyd yr amser y digwyddodd y troseddu, nifer yr eitemau bwyd a oedd wedi mynd heibio eu dyddiad defnyddio, maint, graddfa a throsiant y sefydliad, a'r ffaith fod yr ymdrechion a wnaed gan y cwmni i fynd i'r afael â'r troseddu yn aneffeithiol.

Cafodd Asda Stores Limited ddirwy o £640,000, a gorchmynnwyd iddynt dalu £15,115 mewn costau erlyn a Gordal Dioddefwr o £2,000. Roedd y pedwar tramgwydd yn torri Rheoliad 4 9 (b) o Reoliadau Bwyd Cyffredinol 2004, sy'n ymwneud â gwerthu bwyd anniogel.