·      Cyngor Mae Rhentu Doeth Cymru wedi ffurfio partneriaeth â Chyfoeth Naturiol Cymru i gyflwyno cwrs rheoli llifogydd hanfodol

·      Gwaith Adnewyddu Cartref Cŵn Caerdydd ar y gweill ar ôl ymdrech codi arian gwerth £500,000

·      Cyngor Caerdydd yn ymrwymo i fod yn Gyflogwr sy’n Ystyriol o Endometriosis

·      Ysgol Glan Morfa yn dathlu adroddiad canmoladwy gan Estyn 

Mae Rhentu Doeth Cymru wedi lansio hyfforddiant Rheoli Llifogydd newydd ar gyfer landlordiaid ac asiantiaid, a ddatblygwyd mewn cydweithrediad â Cyfoeth Naturiol Cymru.

Mae'r cwrs Datblygiad Proffesiynol Parhaus (DPP) yn rhad ac am ddim ac mae bellach ar gael ar wefan Rhentu Doeth Cymru.  

Gydag 1 o bob 7 cartref a busnes yng Nghymru mewn perygl o lifogydd, a chyda'r argyfwng hinsawdd yn dod â thywydd mwy eithafol, mae'n bwysicach nag erioed bod pobl yn gwybod ac yn deall eu perygl o lifogydd.

Darllenwch fwy yma

Mae gwaith adnewyddu wedi dechrau'n swyddogol yng Nghartref Cŵn Caerdydd, gan nodi cam mawr ymlaen o ran gwella cyfleusterau ar gyfer cŵn coll a chŵn y cefnwyd arnynt yng Nghaerdydd.

Mae'r gwaith adnewyddu yn bosibl diolch i ymdrechion codi arian gwych The Rescue Hotel, elusen gofrestredig a sefydlwyd yn 2020 i gefnogi Cartref Cŵn Caerdydd.

Wedi'i lansio gan gyn-gapten rygbi Cymru a chennad The Rescue Hotel, Sam Warburton, cododd eu hymgyrch codi arian dros £500,000 i uwchraddio'r cytiau. Mae hyn yn cynnwys rhodd hael o £180,000 gan y Pets Foundation.

Darllenwch fwy yma

Cyngor Caerdydd yw'r sefydliad diweddaraf i wneud addewid i gefnogi cydweithwyr y mae endometriosis yn effeithio arnynt, drwy ymuno â'r cynllun Cyflogwyr sy’n Ystyriol o Endometriosis.

Gyda 14,800 o staff, dyma'r corff llywodraeth leol mwyaf i wneud yr ymrwymiad hwn, a dim ond yr ail yng Nghymru i wneud hynny, ar ôl Cyngor Sir Powys.

Trwy'r cynllun, sy'n cael ei redeg gan yr elusen Endometriosis UK, bydd Cyngor Caerdydd yn gwella ei gefnogaeth i'r rhai y mae’r clefyd cyffredin hwn yn effeithio arnynt, yn ogystal â chwalu’r tabŵ a’r stigma ynghylch iechyd mislif.

Darllenwch fwy yma

Yn ystod arolwg diweddar gan Estyn, mae Ysgol Glan Morfa yn y Sblot wedi cael ei chanmol am ei gwerthoedd cryf, ei hethos cynhwysol a'i hymrwymiad i les a chynnydd disgyblion.

Tynnodd arolygwyr sylw at y safonau uchel sy'n cael eu gosod gan arweinwyr yr ysgol, yn ogystal â gweledigaeth glir, gynhwysfawr sy'n rhoi cynnydd a lles disgyblion wrth ei chalon. Mae'r adroddiad yn canmol partneriaethau cryf yr ysgol gyda rhieni, llywodraethwyr, a'r gymuned ehangach, sy'n helpu i ddarparu cyfleoedd dysgu diddorol ac ystyrlon.

Rhoddwyd canmoliaeth arbennig i waith yr ysgol wrth ddatblygu dealltwriaeth bersonol, gymdeithasol a moesol disgyblion, a'i hymrwymiad i ddathlu a pharchu amrywiaeth ddiwylliannol.

Mae'r adroddiad hefyd yn cydnabod gwaith gwych Ysgol Glan Morfa yn hyrwyddo'r Gymraeg a rôl ganolog yr iaith ym mywyd bob dydd yr ysgol. Mae'r ysgol yn falch o feithrin siaradwyr Cymraeg hyderus sy'n cyfrannu at dwf a phwysigrwydd parhaus yr iaith yn y gymuned leol.

Darllenwch fwy yma